परनार्ड रिकार्ड प्रा. लि. कंपनीकडून स्वातंत्र्यदिनाच्या दिवशी विद्यार्थ्यांना साहित्य वाटप सुनील घुमरेनाशिक विभागीय प्रतिनिधी दिंडोरी तालुक्यातील कादवा म्हाळुंगी येथील परनार्ड रिकार्ड कंपनी तालुक्यात विकास कामांसोबतच आरोग्य व शिक्षण याकडे लक्ष देऊन पुढाकार घेत आहे. दरवर्षीप्रमाणे या वर्षीही कोरोनाचा कालावधी असतानाही स्वातंत्र्य दिनाच्या दिवशी कोविड 19 चे सर्व नियम पाळत परिसरातील 15 गावांतील जिल्हा परिषद शाळेच्या विद्यार्थ्यांना ब्रॅण्डेड कंपनीचे शैक्षणिक साहित्य व खाऊचे वाटप करण्यात आले आहे.विद्यार्थ्यांच्या कलागुणांना वाव मिळण्यासाठी कंपनीच्या माध्यमातून विविध स्पर्धा घेण्यात येतात परंतु गेल्या वर्षीपासून शाळा बंद असल्याने स्पर्धां न घेताही गुणवंत विद्यार्थी यांना साहित्य व खाऊ शाळेवर जाऊन वाटप करण्यात आला.यात जिल्हा परिषदेच्या कादवा म्हाळुगी, वलखेड, पाडे, अवनखेड, निगडोळ, ओझे, म्हेळुस्के, अक्राळे, करंजवन, ढकांबे, तळेगाव, ओझरखेड, दिंडोरी, खतवड, वनारवाडी आदी पंधरा शाळांतील गोरगरीब व होतकरू विद्यार्थ्यांना उपयुक्त शैक्षणिक साहित्य व खाऊ देण्यात आला.स्वातंत्र्यदिना निमित्त आयोजित ठिकठिकाणच्या कार्यक्रमात या वस्तूचे वितरण करण्यात आल्याने विद्यार्थ्यांमध्ये आनंदाचे वातावरण निर्माण झाले असून या गावांचे सरपंच, उपसरपंच , शालेय व्यवस्थापन समिती अध्यक्ष ,सदस्य तथा पालकांनी कंपनी व्यवस्थापनाचे आभार व्यक्त केले आहेत.
हा उपक्रम यशस्वी करण्यासाठी मुख्य व्यवस्थापक संजय खुंटीया ,व्यवस्थापक राजेंद्र देशमुख यांच्या मार्गदर्शनाखाली या योजनेचे प्रमुख वाईनरी विभाग प्रमुख शरद नागरे यांनी नियोजन करून विशेष परिश्रम घेतले.