🚨 दहा हजारांची लाच घेताना कृषी विभागातील दोघे जाळ्यात
धुळे प्रतिनिधी | कार्यकारी संपादक गोकुळ देवरे
प्रधानमंत्री किसान सन्मान निधी आणि नमो शेतकरी महासन्मान निधी योजनेच्या अनुदानाच्या रकमेच्या मोबदल्यात दहा हजार रुपयांची लाच स्वीकारताना प्रतिबंधक लाचलुचपत विभागाने धुळे येथे कृषी विभागातील दोन कर्मचाऱ्यांना रंगेहाथ अटक केली आहे.
अटक झालेल्यांमध्ये साक्री तालुका कृषी कार्यालयातील सहायक कृषी अधिकारी मनसीराम कोळशीराम चौरे आणि कंत्राटी डाटा ऑपरेटर रिजवान रफिक शेख यांचा समावेश आहे.
प्रकरण काय आहे?
पन्हाळीपाडा (ता. साक्री) येथील एका शेतकऱ्याच्या जमिनीवर जमा झालेल्या किसान सन्मान निधी व नमो शेतकरी महासन्मान निधीच्या अनुदानाच्या रकमेसाठी या दोघांनी दहा हजार रुपयांची लाच मागितली होती.
शेतकऱ्याने याबाबत दि. १ सप्टेंबर रोजी धुळे लाचलुचपत विभागाकडे तक्रार दाखल केली.
एसीबीचा सापळा
तक्रारीनंतर पोलीस निरीक्षक पद्मावती कलाल यांनी साक्री येथे जाऊन पडताळणी केली. पडताळणीदरम्यान आरोपींनी लाचेची मागणी स्पष्ट झाल्यावर एसीबीने सापळा रचला.
कारवाईदरम्यान चौरे व शेख यांनी तक्रारदाराकडून ७ हजार रुपयांची लाच स्वीकारली आणि त्याचवेळी एसीबीच्या पथकाने त्यांना रंगेहाथ पकडले.
पुढील कार्यवाही
दोन्ही आरोपींविरुद्ध धुळे लाचलुचपत प्रतिबंधक विभाग पोलीस ठाण्यात भ्रष्टाचार प्रतिबंधक कायदा कलम ७ अंतर्गत गुन्हा दाखल करण्यात आला असून पुढील तपास सुरू आहे.
कारवाईत सहभागी अधिकारी
ही कारवाई पोलीस अधीक्षक भारत तांगडे, अपर पोलीस अधीक्षक माधव रेड्डी व सुनिल दोरगे यांच्या मार्गदर्शनाखाली पार पडली.
यामध्ये उप अधीक्षक सचिन साळुंखे, पोलीस निरीक्षक पद्मावती कलाल, यशवंत बोरसे यांच्यासह राजन कदम, मुकेश अहिरे, प्रविण मोरे, संतोष पावरा, मकरंद पाटील, रामदास बारेला, प्रविण पाटील, सागर शिर्के, प्रितेश चौधरी, रेश्मा परदेशी, सुधीर मोरे आणि जगदीश बडगुजर या पथकाने सहभाग घेतला.