त्या खूनातील आरोपीस १६ जूनपर्यंत पोलिस कोठडी
पिशोर
(प्रतिनिधी अस्लम शेख):कन्नड तालुक्यातील दिगाव येथे मंगळवार, दिनांक १० जून रोजी सख्या भावाने गळ्यावर व पाठीवर धारदार शस्त्राने सपासप वार करून आपल्या भावाचा खून केल्याची धक्कादायक घटना घडली. या प्रकरणी मोठा भाऊ प्रकाश भिमराव आव्हाड यांच्या तक्रारीवरून विनोद भिमराव आव्हाड याच्याविरुद्ध पिशोर पोलीस ठाण्यात खुनाचा गुन्हा दाखल करण्यात आला होता.संशयित आरोपी विनोद भिमराव आव्हाड हा गुन्हा करून घटनास्थळावरून फरार झाला होता. पोलिसांनी रात्रभर शोधमोहीम राबवून त्याला दुसऱ्या दिवशी, दिनांक ११ जून रोजी सकाळच्या सुमारास एका पत्र्याच्या शेडमध्ये लपलेला असताना अटक केली.त्याला १२ जून रोजी कन्नड न्यायालयात हजर केले असता, न्यायालयाने त्यास १६ जून २०२५ पर्यंत पोलिस कोठडीत ठेवण्याचा आदेश दिला आहे. या प्रकरणाची माहिती सहाय्यक पोलीस निरीक्षक शिवाजी नागवे व रायटर विलास सोनवणे यांनी दिली.