चालकानेच रचला मालकाला लुटण्याचा कट : डोळ्यात मिरची पूड टाकून पावणे पाच किलो सोन्याची पिशवी लंपास
(बुलढाणा प्रतिनिधी सय्यद इरफान)
समृद्धी महामार्गावर घडलेल्या एका धक्कादायक प्रकरणात चालकानेच आपल्या मालकाला लुटण्यासाठी साथीदारांसह कट रचल्याचे उघड झाले आहे. २२ ऑगस्ट रोजी सायंकाळच्या सुमारास मेहकरजवळ हा थरारक प्रकार घडला.
मुंबईचे सोन्याचे व्यापारी अनिल शेशमलजी जैन चौधरी हे कीया (क्रमांक एमएच-४३ बीयू ९५५७) कारने आपल्या चालकासह प्रवास करीत होते. प्रवासादरम्यान चालकाने ‘पोट दुखत आहे, तुम्हीच गाडी चालवा’ असे सांगत चौधरी यांना स्टेअरिंग हाती घ्यायला लावले. काही अंतरानंतर पोटदुखीचे कारण सांगून त्यानेच मालकाला गाडी रस्त्याच्या कडेला उभी करण्यास भाग पाडले.
गाडी थांबताच मागून आलेल्या इनोव्हा कारमधील ४-५ अज्ञात दरोडेखोरांनी व्यापाऱ्यावर हल्ला केला. चौधरी यांच्या हातावर चाकू मारला गेला तसेच डोळ्यांत मिरची पूड टाकण्यात आली. त्याच क्षणी चालकानेच मालकाकडील जवळपास पावणे पाच किलो वजनाची सोन्याची पिशवी हिसकावून दरोडेखोरांच्या गाडीत बसून मालेगावच्या दिशेने पलायन केले.
घटनेची माहिती मिळताच मेहकर पोलिसांनी तत्काळ घटनास्थळी धाव घेतली. मात्र तोपर्यंत दरोडेखोरांची गाडी मालेगाव टोलनाका ओलांडून पातुरच्या दिशेने गेली होती. नाकाबंदी दरम्यान पातुरच्या जंगल परिसरात दरोडेखोरांनी आपली गाडी सोडून दिल्याचे समजले.
या घटनेमुळे व्यापारी व महामार्गावरील प्रवासी वर्गामध्ये भीतीचे वातावरण निर्माण झाले आहे. पोलिसांनी फरार आरोपी व त्यांच्या साथीदारांचा शोध सुरू केला आहे.