महसूल सप्ताहानिमित्त भोलाणे शिवारात वृक्षारोपण; हरित पट्टा निर्मितीसाठी ग्रामस्थांचा पुढाकार
भोलाणे (ता. पारोळा), दि. ३ ऑगस्ट २०२५:
महसूल सप्ताहाचे औचित्य साधून भोलाणे शिवारातील पानंद रस्त्यावर वृक्षारोपणाचा उपक्रम उत्साहात पार पडला. या उपक्रमात ग्रामपंचायत सदस्य, महसूल विभागाचे अधिकारी, पोलीस पाटील, महसूल सेवक तसेच स्थानिक शेतकरी व ग्रामस्थांनी उत्स्फूर्त सहभाग नोंदवला.
कार्यक्रमामध्ये विविध प्रकारच्या स्थानिक व उपयुक्त झाडांचे रोपण करण्यात आले. या वृक्षारोपणामुळे रस्त्याच्या दुतर्फा हरित पट्टा निर्माण होणार असून, परिसरातील पर्यावरण संतुलन आणि जैवविविधता वृद्धिंगत होण्यास मदत होणार आहे. भविष्यात हे झाडे छायादायी व प्रदूषणमुक्त वातावरण निर्माण करतील, असा विश्वास उपस्थित मान्यवरांनी व्यक्त केला.
या उपक्रमाचे मार्गदर्शन श्री. उल्हास देवरे (तहसीलदार, पारोळा) आणि सौ. भारती शेवाळे (मंडळ अधिकारी, बहादरपूर) यांनी केले. यावेळी श्री. निंबा भिका पाटील (सरपंच), श्री. शिवाजी कन्हैयालाल पाटील (उपसरपंच), श्री. अरुण मधुकर पाटील, श्री. मोतीलाल लक्ष्मण पाटील, श्री. सतीश गिरधर पाटील, श्री. प्रवीण सुखदेव सोनवणे (ग्राम महसूल अधिकारी), श्री. दिनकर मन्साराम पाटील (पोलीस पाटील), श्री. गुलाब सुका पाटील (महसूल सेवक), तसेच श्री. युवराज काशिनाथ पाटील (सामाजिक कार्यकर्ते) उपस्थित होते.
प्रत्येक मान्यवराने ग्रामस्थांना वृक्षांचे संगोपन करण्याचे आवाहन केले. पर्यावरणपूरक उपक्रमांमुळे समाजात जनजागृती होत असून, भविष्यातील हिरवे शिवार टिकवण्यासाठी ही पावले अत्यंत महत्त्वाची ठरणार आहेत.