तालुकास्तरीय विज्ञान प्रदर्शनासाठी चार उत्कृष्ट प्रकल्पांची निवड
– प्राचार्या सोनाली पाटील यांची माहिती
पिंपळनेर | दि. १५ डिसेंबर
(साक्री तालुका प्रतिनिधी : अंबादास बेनुस्कर)
साक्री तालुक्यातील भामेर येथे दिनांक १६ व १७ डिसेंबर रोजी होणाऱ्या तालुकास्तरीय विज्ञान प्रदर्शनाच्या पार्श्वभूमीवर पिंपळनेर येथील राजे छत्रपती इंग्लिश मीडियम मार्शल आर्ट स्कूल मध्ये विज्ञान प्रदर्शनाचे आयोजन करण्यात आले.
या प्रदर्शनाचा मुख्य उद्देश विद्यार्थ्यांमध्ये वैज्ञानिक दृष्टिकोन विकसित करणे हा असल्याची माहिती शाळेच्या मुख्याध्यापिका सोनाली पाटील यांनी पत्रकार परिषदेत दिली. तालुकास्तरीय विज्ञान प्रदर्शनासाठी प्रत्येक शाळेतून चार उत्कृष्ट प्रकल्पांची निवड केली जाणार असल्याचे त्यांनी स्पष्ट केले.
या कार्यक्रमास संस्थेचे सचिव रा. ना. पाटील, चेअरमन संभाजी अहिरराव, जगदीश ओझरकर, मुख्याध्यापिका सोनाली पाटील यांच्यासह शिक्षकवृंद उपस्थित होते.
विज्ञान प्रदर्शनात विद्यार्थ्यांनी विविध नाविन्यपूर्ण व उपयुक्त प्रकल्प सादर करून उपस्थितांचे लक्ष वेधून घेतले. यामध्ये
वनस्पतींचे भाग, पवनचक्की, गणितीय प्रकल्प, होलोग्राम, पर्यावरण व जलसंवर्धन, चंद्रयान-३, रेन वॉटर हार्वेस्टिंग, सौर ऊर्जा, हायड्रोइलेक्ट्रिक धरण, वेस्ट वॉटर ट्रीटमेंट, सोलर इरिगेशन, ऊर्जा संवर्धन, लाई-फाय तंत्रज्ञान आदी विषयांचा समावेश होता.
यावेळी बोलताना मुख्याध्यापिका सोनाली पाटील म्हणाल्या की,
“विज्ञान ही निरीक्षण, प्रयोग व विश्लेषणातून सत्य शोधण्याची शिस्तबद्ध प्रक्रिया आहे. विज्ञानामुळे दैनंदिन जीवन अधिक सुलभ, सुरक्षित व प्रगत झाले आहे. विद्यार्थ्यांनी क्रमांकाची चिंता न करता विज्ञान प्रदर्शनात उत्स्फूर्त सहभाग घ्यावा.”