कर्मवीर आनंदराव माणिकराव पाटील वरिष्ठ महाविद्यालयात वार्षिक स्नेहसंमेलन व पारितोषिक वितरण समारंभ संपन्न
पिंपळनेर,दि.9(साक्री तालुका प्रतिनिधी अंबादास बेनुस्कर प्रतिनिधी )महिला दिन आहे.प्रत्येक यशस्वी पुरुषाच्या यशात स्त्रीचा महत्त्वाचा वाटा असतो. मुलींनी खूप शिकलं पाहिजे. चांगलं वागलं पाहिजे,जेणेकरून आई-वडिलांना वाटलं पाहिजे की आम्ही वाघिणीला जन्म दिला आहे.ज्या स्त्रियांनी बाबा,बुवा म्हणजेच अंधश्रद्धेला पूजलं त्या स्त्रिया देशोधडीला लागल्या पण ज्यांनी सावित्रीबाई फुलेंना, जिजाऊंना मानलं त्या पंतप्रधान व राष्ट्रपती झाल्या. शिक्षणामुळे अनेक स्त्रियांचे आयुष्य बदलले.डॉ. बाबासाहेब आंबेडकर म्हणायचे की शिक्षण हे वाघिणीचे दूध आहे ते जो प्राशन करील तो गुरगुरल्याशिवाय राहणार नाही त्यामुळे ह्या शिक्षणाची कास गाव,पाड्यावरील,वस्तीवरील विद्यार्थ्यांनी धरायला हवी. मुलींना शिकता यावे म्हणून सावित्रीबाई फुलेंनी जीवाचे रान केले.त्यामुळे मुलींनी शिकायला हवे.असे मत वार्षिक स्नेहसंमेलन व पारितोषिक वितरण समारंभ प्रसंगी लोकनेते माणिकराव गावित कला व वाणिज्य महाविद्यालयाच्या प्राचार्या डॉ. जयश्रीताई गावित यांनी व्यक्त केले. पिंपळनेर येथील वरिष्ठ महाविद्यालयाच्या वार्षिक पारितोषिक वितरण समारंभाप्रसंगी व्यासपीठावर कार्यक्रमाचे अध्यक्ष धनराज जैन,प्रमुख अतिथी म्हणून नाशिक येथील प्रसिद्ध कवी व व्याख्याते प्रा.संदीप जगताप, पिंएसोचे सचिव एस.एस. बिरारीस,संचालक हिरामण गांगुर्डे,पिंपळनेर एज्युकेशन सोसायटीचे संचालक डॉ.विवेकानंद शिंदे,शरद शिंदे,प्राचार्य आर.पी.लोहार, महाविद्यालयाचे प्राचार्य डॉ.एल.बी.पवार व स्नेहसंमेलन प्रमुख प्रा. डॉ.सतीश मस्के आदी मान्यवर उपस्थित होते. प्राचार्या डॉ.जयश्रीताई गावित पुढे म्हणाल्या की, मुलींनी आपल्या जीवनामध्ये शिक्षण घेऊन प्रगतीची कास धरायला हवी.आज स्त्रिया नानाविध क्षेत्रामध्ये आपलं स्वतःचं एक अस्तित्व निर्माण करताना दिसत आहेत.अनेक मुलींनी अंतराळापर्यंत मजल मारली आहे.त्यामुळे आजच्या विद्यार्थिनींनी सर्वांगीण व्यक्तिमत्त्वाचा विकास शिक्षणाच्या माध्यमातून करायला हवा. या वेळी प्रमख अतिथी पिंपळगाव महाविद्यालयाचे प्रा.संदीप जगताप म्हणाले की,हल्लीच्या या युगामध्ये संस्कृतीची नासधूस होताना दिसते आहे.अनेक जण अंधश्रद्धेच्या नादी लागून स्वतःचे आयुष्य बरबाद करून घेत आहेत.वैज्ञानिक दृष्टिकोनापासून अलिप्त राहताना दिसत आहेत.हल्ली जाती,धर्माचे प्राबल्य वाढत चालले आहे.त्यामध्ये माणूस अडकून जाऊन स्वतःचे जीवन उध्वस्त करून घेत आहे. विद्यार्थ्यांनी ह्या साऱ्या गोष्टी लक्षात घेऊन अंगी वैज्ञानिक दृष्टिकोन बाळगायला हवा. तुम्हाला जर पिकलेलं विकता आलं तरच खऱ्या अर्थाने तुमचा देश महासत्ता होईल. भारतातील लोक विविध देशात कामाच्या निमित्ताने पोहोचले आहेत परंतु भारत देशात इतर देशातील लोक कामाच्या निमित्ताने आले नाहीत हेही विद्यार्थ्यांनी ओळखायला हवे.अशा अनेक विविध बारीक-सारीक किस्स्यामधून त्यांनी फुले, शिवाजी महाराज,संभाजी महाराज,संत तुकाराम आदींचे दाखले देऊन विद्यार्थ्यांनी जीवनात कसे वागावे आणि कसे राहावे हे अत्यंत सुंदर पद्धतीने सांगितले.त्यामुळे विद्यार्थीही मंत्रमुग्ध झाले. यावेळी अध्यक्षीय समारोप करताना धनराज जैन म्हणाले की,शिक्षणाने माणूस सुसंस्कृत होतो.आपल्या अंगातील कलागुण दाखवून विद्यार्थ्याने स्वतःची प्रगती करायला हवी. स्नेहसंमेलनाच्या निमित्ताने विद्यार्थी घडण्यास मदत होते. स्नेहसंमेलन व वार्षिक पारितोषिक वितरण समारंभाचे प्रास्ताविक प्राचार्य डॉ.एल.बी.पवार यांनी केले. स्नेहसंमेलना निमित्त वार्षिक अहवालाचे वाचन स्नेहसंमेलन प्रमुख प्रा.डॉ.सतीश मस्के यांनी केले.या कार्यक्रमांमध्ये गुणवंत प्राध्यापक म्हणून पीएच्.डी मिळवलेले डॉ.शुभम गौड,डॉ.श्रुती गौड व प्रा.धर्मेंद्र बागुल यांचा सत्कार करण्यात आला.कार्यक्रमाची सुरुवात जागतिक महिला दिनाच्या निमित्ताने क्रांतीज्योती सावित्रीबाई फुले,माता जिजाऊ व बहिणाबाई चौधरी यांच्या प्रतिमेस पुष्पहार अर्पण करून करण्यात आली.पारितोषिक वितरण समारंभा नंतरही सांस्कृतिक विभागाचे प्रा.के.एन.वसावे यांनी काही निवडक विद्यार्थ्यांचे आदिवासी नृत्य व गीत सादर करून प्रमुख मान्यवरांना व विद्यार्थ्यांना मंत्रमुग्ध केले.आयेशा शेख या विद्यार्थिनींनी ओ मेरी मा हे सुंदर गीत सादर केले.अकॅडमी जनरल चॅम्पियन म्हणून चेतना प्रवीण निकुम व जिमखाना जनरल चॅम्पियन म्हणून भवरे राहुल संजय व हर्षदा शरद अहिरराव यांना सन्मानित करण्यात आले.कार्यक्रमाचे सूत्रसंचालन आयक्युएसी चे समन्वयक प्रा.डॉ.संजय खोडके व प्रा.सी.एन.घरटे यांनी केले.आभार प्रा.डॉ. वाय.एम.नांद्रे यांनी मानले. कार्यक्रमाला प्राध्यापक, प्राध्यापकेत्तर कर्मचारी व विद्यार्थी यांनी मोठ्या संख्येने उपस्थित राहून सहकार्य केले.
छाया:अंबादास बेनुस्कर