शेतकऱ्यांच्या कर्जमाफीसाठी आ.गावितांच्या कार्यालयावर मध्यरात्री 'प्रहार'चे मशाल आंदोलन
पिंपळनेर,दि.13(साक्री तालुका प्रतिनिधी अंबादास बेनुस्कर)शेतक-यांच्या कर्जमाफीसाठी प्रहार जनशक्ती पक्षाचे संस्थापक अध्यक्ष माजी आ.बधू कडू यांच्या आदेशावरून साक्रीच्या शिवसेनेच्या आमदार मंजुळा गावीत यांच्या साक्रीतील कार्यालयावर मध्यरात्री प्रहारने मशाल आंदोलन केले.मशाल आंदोलनाचा इशारा याआधीच प्रहारने दिला होता. त्यानुसार हे आंदोलन करण्यात आले.त्या अनुषंगाने साक्री प्रहार जनशक्ती पक्ष व प्रहार दिव्यांग संघटनेकडून साक्री येथील आमदार मंजुळा गावित यांच्या कार्यालयावर रात्री बारा वाजेच्या सुमारास क्रांतिसूर्य महात्मा ज्योतिबा फुले,छत्रपती शिवाजी महाराज आणि डॉ. बाबासाहेब आंबेडकर या महामानवांच्या घोषणा देत हातात मशाल,गळ्यात निळे पटके व भगवा ध्वज हातात घेत आंदोलन करण्यात आले. महायुती सरकार सत्तेवर येण्यापूर्वी शेतक-यांची कर्जमाफी व सातबारा कोरा करू असे जाहीरनाम्यात भोळ्या भाबड्या शेतकऱ्यांना आश्वासित केले होते मात्र आता महायुती सरकार शेतकऱ्यांच्या कर्जमाफीचा चकार शब्द काढत नाही. राज्यात दिवसाला सात शेतकरी आत्महत्या करीत असल्याचे अहवाल सांगत आहे.शेतकऱ्यांच्या कर्जमाफीसाठी,शेतकऱ्यांच्या मालाला हमीभाव मिळण्यासाठी व दिव्यांगाला मासिक वेतन सहा हजार रुपये मिळावे यासाठी आपल्या स्तरावर पाठपुरावा करावा व न्याय मिळवून द्यावा अशी मागणी मशाल आंदोलनाच्या माध्यमातुन करण्यात आली.आमदार मंजुळा गावित यांचे प्रतिनिधी म्हणून अजय सोनवणे आणि बाळा शिंदे यांनी निवेदन स्वीकाराले.याप्रसंगी तालुका विभाग प्रमुख जयेश बावा,दिव्यांग संघटना तालुका अध्यक्ष संजय पाटील,शेतकरी संघटना साक्री तालुका अध्यक्ष योगेश जाधव,नाना शेलार,तालुका उपाध्यक्ष सोमनाथ सूर्यवंशी,राहुल गवळे,कैलास भदाणे, शशिकांत अहिरराव,राजेंद्र भदाणे,प्रदीप सोनवणे, अशोक बच्छाव,युवराज मराठे,लहानू कारंडे,राजेंद्र सोनवणे,अतुल भदाणे,तात्या नेरकर,वसू वाघ आदी उपस्थित होते.छाया:अंबादास बेनुस्कर