पिरबावडा येथे बियरबार फोडून लाखोची दारू पळवली; सीसीटीव्ही फोडले, डीव्हीआरही चोरीस

पिरबावडा येथे बियरबार फोडून लाखोची दारू पळवली; सीसीटीव्ही फोडले, डीव्हीआरही चोरीस

फुलंब्री (प्रतिनिधी बशीर पठाण) —
फुलंब्री तालुक्यातील पिरबावडा गावात चोरट्यांनी सोमवारी (दि. ९ जून) मध्यरात्री अनिल बिअरबार फोडून सुमारे 1.25 लाख रुपयांची विदेशी दारू, रोख रक्कम व सीसीटीव्ही उपकरणे चोरून नेल्याची धक्कादायक घटना उघडकीस आली आहे.

पोलिसांनी दिलेल्या माहितीनुसार, महावीर जयस्वाल यांच्या मालकीचा हा बियरबार रात्री 11.30 वाजता बंद करण्यात आला होता. मध्यरात्रीनंतर चोरट्यांनी शटर व आतील दरवाजाचे कुलूप तोडून घुसखोरी केली.

चोरट्यांनी बियरबारच्या गोडाऊनमधील विदेशी दारूच्या 742 बाटल्या, ज्याची एकूण किंमत ₹1,12,237 आहे, त्या लंपास केल्या. याशिवाय, गल्ल्यातील ₹11,500 रोख रक्कम आणि ₹3,000 किमतीचा डीव्हीआर देखील चोरीस गेला. विशेष म्हणजे चोरट्यांनी सीसीटीव्ही कॅमेऱ्यांचीही तोडफोड केली.

ही घटना लक्षात येताच वडोदबाजार पोलीस ठाण्याचे अधिकारी आणि श्वान पथकाने घटनास्थळी भेट दिली. महावीर जयस्वाल यांच्या तक्रारीवरून गुन्हा दाखल करण्यात आला आहे.

या प्रकरणाचा तपास सहाय्यक पोलीस निरीक्षक सुनील इंगळे यांच्या मार्गदर्शनाखाली पोलीस कर्मचारी दत्ता मोरे हे करत आहेत.

पोलिसांकडून तपास सुरू असून, परिसरातील इतर सीसीटीव्ही फुटेजची तपासणी करून आरोपींचा माग काढण्याचा प्रयत्न केला जात आहे.