📰 खबरदार! प्रमाणापेक्षा जास्त खडी वाहतूक करणारा हायवा पकडला
पिशोर सर्कल प्रतिनिधी अस्लम शेख
प्रादेशिक परिवहन विभागाच्या वायुवेग पथकाने साखरवेल (ता. कन्नड) गावाजवळ खडीने भरलेला एक हायवा पकडला आहे. हायवामध्ये प्रमाणित वजनापेक्षा अधिक खडी आढळल्यामुळे मोटार वाहन निरीक्षक विलास वडीतके यांनी ₹३४,५००/- चा दंड आकारला आहे.या मोहिमेतील अधिक माहिती अशी आहे की, प्रादेशिक परिवहन अधिकारी विजय काठोळे यांच्या आदेशानुसार हे पथक तपासणी करत होते. त्यामध्ये अधिकारी श्री. विलास वडितके, सहायक निरीक्षक शिवाजी पुंगळे, मकरंद जायभाये आणि चालक गजानन फड सहभागी होते.
पिशोर–सिल्लोड रस्त्यावर साखरवेल गावाजवळ एक हायवा (MH 20 EG 6797) खडी वाहून नेत असताना आढळून आला. तपासणी दरम्यान हायवामध्ये अतिरिक्त भार असल्याचे स्पष्ट झाले. हायवा पिशोर पोलीस स्टेशनला आणून दंडाची वसुली करण्यात आली. एकूण वाहन तपासणी मोहिमेमध्ये ₹१,३५,०००/- इतका दंड वसूल झाल्याची माहिती श्री. वडीतके यांनी दिली.
🟥 चौकट:
या भागात प्रचंड प्रमाणात अतिभार वाहनांची वाहतूक चालते. यामुळे रस्त्यांची मोठी हानी होत असून, फक्त काही वाहनांवर कारवाई करून या समस्येवर थांबा बसणार नाही, असे जागृत नागरिकांचे मत आहे.