शेतातील विहिरीतील मोटार चोरी प्रकरणाचा उलगडा; ८० हजारांच्या दोन मोटारी जप्त
पैठण, प्रतिनिधी इकबाल शेख : MIDC पैठण पोलिसांनी शेतकऱ्याच्या शेतातील विहिरीतून पाण्याची मोटार चोरी करणाऱ्या अज्ञात चोरट्यांचा शोध घेत धडाकेबाज कारवाई केली आहे. या कारवाईत पोलिसांनी ८० हजार रुपये किंमतीच्या दोन इलेक्ट्रिक मोटारी जप्त केल्या आहेत.
दिनांक २० मे २०२६ रोजी MIDC पैठण पोलीस ठाण्याच्या हद्दीतील ईसारवाडी येथील शेतकरी जगन्नाथ गंजाजी बोबडे यांच्या शेतातील विहिरीत बसविण्यात आलेली ०३ एचपी क्षमतेची पारसमणी कंपनीची इलेक्ट्रिक मोटार अज्ञात चोरट्यांनी चोरी करून नेली होती. याबाबत त्यांनी MIDC पैठण पोलीस ठाण्यात तक्रार दाखल केली होती.
सदर गुन्ह्याचा तपास करताना पोलिसांना गोपनीय माहितीदारामार्फत महत्त्वाची माहिती मिळाली. त्यानुसार आत्माराम सखाराम जगदाळे, प्रभाकर बाबुराव बर्डे (दोघेही रा. धनगाव, ता. पैठण), गंगाराम रामनाथ माळी (रा. बोरगाव, ता. पैठण) आणि तुळशीराम दिलीप गायकवाड (रा. ईसारवाडी, ता. पैठण) यांना ताब्यात घेऊन चौकशी करण्यात आली.
चौकशीदरम्यान आरोपींनी दोन इलेक्ट्रिक मोटारी चोरी केल्याची कबुली दिली. त्यानंतर पोलिसांनी आरोपींकडून ८० हजार रुपये किंमतीच्या दोन इलेक्ट्रिक मोटारी जप्त केल्या.
ही उल्लेखनीय कारवाई जिल्हा पोलीस अधीक्षक प्रकाश जाधव, अपर पोलीस अधीक्षक प्रशांत स्वामी आणि उपविभागीय पोलीस अधिकारी सुनील पाटील यांच्या मार्गदर्शनाखाली MIDC पैठण पोलीस ठाण्याचे सहाय्यक पोलीस निरीक्षक भरत मोरे, पोलीस हवालदार मोहतमल व पोलीस कॉन्स्टेबल घोडके यांनी केली.
शेतकऱ्यांच्या मालमत्तेवर डल्ला मारणाऱ्या चोरट्यांविरोधात MIDC पैठण पोलिसांची ही कारवाई कौतुकास्पद मानली जात असून परिसरात समाधान व्यक्त करण्यात येत आहे.
अधिक बातम्यांसाठी सिल्लोड एक्सप्रेस (SX न्यूज) ला Subscribe, Like आणि Share करा..