संपादकावर जीवघेणा हल्ला – लोकशाही पत्रकार संघटनेची कठोर कारवाईची मागणी
सिल्लोड, दि. 11 (प्रतिनिधी – निलोफर शेख)
११ ऑगस्ट २०२५ रोजी गोळेगाव बस स्टँडजवळ सिल्लोड एक्सप्रेस वृत्तपत्राचे संपादक यांच्यावर काही व्यक्तींनी जीवघेणा हल्ला केला. संपादक आपल्या वाहनासह उजवीकडे वळत असताना या हल्ल्याची घटना घडली. या प्रकारामुळे पत्रकारिता क्षेत्रात संतापाची लाट उसळली असून, हा हल्ला केवळ व्यक्तीवर नसून लोकशाहीच्या चौथ्या स्तंभावर झालेला आहे, असे मत विविध पत्रकार संघटनांनी व्यक्त केले आहे.
या घटनेविरोधात लोकशाही पत्रकार संघटनेच्या वतीने सिल्लोड उप पोलीस आयुक्त तसेच अजिंठा पोलिस ठाण्यास निवेदन देण्यात आले. निवेदनात आरोपींना तात्काळ अटक करून त्यांच्यावर कठोर कायदेशीर कारवाई करण्याची मागणी करण्यात आली. पत्रकार हा जनतेचा आवाज असून, अशा हल्ल्यांना पाठीशी घालणाऱ्यांना माफी देता कामा नये, असे संघटनेचे स्पष्ट मत आहे.
घटनेनंतर परिसरातील पत्रकार व नागरिकांमध्ये तीव्र संताप निर्माण झाला आहे. पत्रकार संघटनांनी इशारा दिला आहे की, आरोपींवर त्वरीत कारवाई झाली नाही तर व्यापक आंदोलन छेडले जाईल.
यावेळी पत्रकार संरक्षण कायद्याची प्रभावी अंमलबजावणी करण्याचीही मागणी करण्यात आली. पत्रकारांवरील वाढते हल्ले रोखण्यासाठी शासनाने कठोर उपाययोजना करणे अत्यंत गरजेचे असल्याचे लोकशाही पत्रकार संघटनेचे म्हणणे आहे.
निवेदन देताना कृष्णा मोरे, वसीम शेख, निलोफर शेख, जहीर कुरैशी, अमजद कुरैशी, सुनील चव्हाण, शेरु शेख तसेच सिल्लोड एक्सप्रेस वृत्तपत्र व लोकशाही पत्रकार संघटनेचे प्रतिनिधी उपस्थित होते.