महाराष्ट्रातील तीन मोठ्या बातम्या अंबडचे तहसीलदार विजय चव्हाण एसीबीच्या जाळ्यात; 6.40 लाखांची लाच स्वीकारताना रंगेहात अटक जालना/बीड | प्रतिनिधी
जालना जिल्ह्यातील अंबडचे तहसीलदार विजय चव्हाण यांना बीड लाचलुचपत प्रतिबंधक विभागाने (एसीबी) मोठ्या कारवाईत रंगेहात अटक केली आहे. वाळू वाहतूक व्यवसायाशी संबंधित प्रकरणात कारवाई न करण्यासाठी तब्बल 7 लाख रुपयांची लाच मागितल्याचा आरोप त्यांच्यावर असून, तडजोडीनंतर 6 लाख 40 हजार रुपयांची रक्कम स्वीकारताना एसीबीच्या पथकाने त्यांना जेरबंद केले.
मिळालेल्या माहितीनुसार, तक्रारदार यांच्याकडे 6 हायवा गाड्या असून ते जालना जिल्ह्यातील गोंदी पोलीस ठाण्याच्या हद्दीत वाळू उपसा व वाहतुकीचा व्यवसाय करतात. या गाड्यांवर कोणतीही दंडात्मक कारवाई न करण्यासाठी तसेच वाळू वाहतुकीसाठी वापरण्यात येणारे पोकलंड मशीन जप्त न करण्याच्या मोबदल्यात तहसीलदार विजय चव्हाण यांनी दरमहा 7 लाख रुपयांच्या ‘मंथली’ची मागणी केल्याचे समोर आले आहे.
या प्रकरणाची तक्रार एसीबीकडे दाखल झाल्यानंतर पडताळणी करण्यात आली. त्यानंतर शनिवारी सायंकाळी सुमारे 6 वाजता छत्रपती संभाजीनगर येथील कासलीवाल मार्व्हल सोसायटी परिसरात सापळा रचण्यात आला. यावेळी विजय चव्हाण यांनी 6 लाख 40 हजार रुपयांची लाच स्वीकारताच एसीबीच्या विशेष पथकाने त्यांना रंगेहात पकडले.विजय चव्हाण हे वर्ग-1 चे राजपत्रित अधिकारी असून शासनाकडून त्यांना दरमहा सुमारे 1 लाख 30 हजार रुपयांहून अधिक वेतन मिळत असल्याची माहिती आहे. तरीही लाचेच्या प्रकरणात अटक झाल्याने महसूल विभागात मोठी खळबळ उडाली आहे.
एसीबीकडून पुढील तपास सुरू असून, या प्रकरणात आणखी काही धक्कादायक बाबी समोर येण्याची शक्यता व्यक्त केली जात आहे./कंपनीतील मालाची चोरी उघडकीस; सिक्युरिटी गार्ड, कामगार व ट्रक चालकास अटक
पैठण | (प्रतिनिधी इकबाल शेख)
एमआयडीसी पैठण परिसरातील एका नामांकित शीतपेय उत्पादक कंपनीतील मालचोरीचा गुन्हा पोलिसांनी अवघ्या २४ तासांत उघडकीस आणला असून, या प्रकरणात सिक्युरिटी गार्ड, कंपनीतील कामगार आणि ट्रक चालकास अटक करण्यात आली आहे. तसेच चोरीचा माल खरेदी करणाऱ्या व्यापाऱ्यालाही आरोपी करण्यात आले आहे.
पोलिसांनी दिलेल्या माहितीनुसार, दिनांक ४ जून २०२६ रोजी एमआयडीसी पैठण पोलीस ठाण्यात तक्रार दाखल झाली होती. वरुण बेव्हरेजेस प्रा. लि. कंपनीमधून स्टिंग कोल्ड्रिंकच्या बाटल्यांचे तीन पॅलेट (२५२ बॉक्स) चोरीला गेल्याची माहिती तक्रारीत देण्यात आली होती. चोरी झालेल्या मालाची किंमत सुमारे १ लाख ५१ हजार २०० रुपये इतकी होती. हा प्रकार १६ मे २०२६ रोजी रात्री ११.४७ ते पहाटे ४ वाजेदरम्यान घडला होता.
या प्रकरणी एमआयडीसी पैठण पोलीस ठाण्यात गुन्हा रजिस्टर क्रमांक १६६/२०२६ अन्वये भारतीय न्याय संहिता कलम ३०३(२) व ३(५) अंतर्गत गुन्हा दाखल करण्यात आला.
गुन्ह्याचा तपास सुरू होताच सहाय्यक पोलीस निरीक्षक भरत मोरे यांनी विशेष पथक तयार करून तपासाची चक्रे वेगाने फिरवली. तपासादरम्यान कंपनीतीलच सिक्युरिटी गार्ड रघुनाथ हरीभाऊ मतकर (रा. शहापूर मानेगाव, ता. पैठण), ट्रक चालक उमेर मुसा शेख आणि कंपनीतील फोर्कलिफ्ट चालक करण लहू शेळके (रा. वाहेगाव) यांनी संगनमताने चोरी केल्याचे निष्पन्न झाले.
पोलिसांनी तिन्ही आरोपींना शोधून अवघ्या २४ तासांत अटक केली. न्यायालयासमोर हजर केले असता त्यांना तीन दिवसांची पोलीस कोठडी सुनावण्यात आली.
पोलीस कोठडीत चौकशीदरम्यान आरोपींनी चोरीचा माल लोहगाव येथील बिकानेर स्वीट मार्टचे मालक चैनसिंग ठाकूर यांना विकल्याची कबुली दिली. त्यानुसार चोरीचा माल खरेदी केल्याप्रकरणी चैनसिंग ठाकूर यांनाही आरोपी करण्यात आले आहे.
या कारवाईत पोलिसांनी आरोपींकडून स्टिंग कोल्ड्रिंकचे १० बॉक्स, १ लाख १ हजार २०० रुपयांची रोकड तसेच गुन्ह्यात वापरण्यात आलेला सुमारे १५ लाख रुपये किमतीचा ट्रक जप्त केला आहे.
ही कारवाई पोलीस अधीक्षक प्रकाश जाधव, अपर पोलीस अधीक्षक प्रशांत स्वामी आणि उपविभागीय पोलीस अधिकारी सुनील पाटील यांच्या मार्गदर्शनाखाली सहाय्यक पोलीस निरीक्षक भरत मोरे, पोलीस उपनिरीक्षक दशरथ बुरकूल, पोलीस कॉन्स्टेबल अंकुश रहाटवाड, मिलिंद घाटेश्वर, अमित घोडके आणि कृष्णा उगले यांनी यशस्वीरीत्या पार पाडली./अवैध हातभट्टी दारू व्यवसायावर पोलिसांचा मोठा प्रहार; सराईत आरोपी एमपीडीए कायद्यान्वये एक वर्षासाठी अकोला कारागृहात
पैठण | प्रतिनिधी
छत्रपती संभाजीनगर ग्रामीण पोलिसांनी अवैध गावठी हातभट्टी दारू निर्मिती व चोरट्या विक्रीविरोधात मोठी कारवाई करत सराईत आरोपी गणेश महादेव पवार (वय 34, रा. ढाकेफळ, ता. पैठण) याला एमपीडीए (MPDA) कायद्यान्वये स्थानबद्ध केले आहे. आरोपीला एक वर्षासाठी अकोला जिल्हा कारागृहात रवानगी करण्यात आली आहे.
पोलीस अधीक्षक प्रकाश जाधव यांनी जिल्ह्यातील संघटित गुन्हेगारीविरोधात कठोर भूमिका घेत अवैध धंदे करणाऱ्यांवर कारवाईची मोहीम सुरू केली आहे. त्याचाच भाग म्हणून ही महत्त्वपूर्ण कारवाई करण्यात आली.
पोलिसांच्या माहितीनुसार, गणेश पवार हा आडदांड व गुंड प्रवृत्तीचा असून तो कायद्याची पर्वा न करता ढाकेफळ व परिसरात बेकायदेशीर गावठी हातभट्टी दारू तयार करून विक्री करत होता. त्याच्या दहशतीमुळे स्थानिक नागरिक त्रस्त झाले होते. तसेच तो तयार करत असलेल्या दारूमध्ये कोणत्याही घटकांचे निश्चित प्रमाण नसल्याने नागरिकांच्या आरोग्यालाही गंभीर धोका निर्माण झाला होता.
आरोपीविरुद्ध महाराष्ट्र दारूबंदी अधिनियम 1949 अंतर्गत कलम 65 (ई) व (फ) अन्वये एकूण सहा गुन्हे दाखल आहेत. यापूर्वी त्याच्यावर कलम 93 अंतर्गत प्रतिबंधात्मक कारवाईही करण्यात आली होती. मात्र, त्याचा कोणताही परिणाम न होता आरोपीने अवैध धंदा सुरूच ठेवला होता.
या पार्श्वभूमीवर स्थानिक गुन्हे शाखा आणि एमआयडीसी पैठण पोलिसांनी आरोपीविरुद्ध एमपीडीए कायद्यान्वये प्रस्ताव तयार करून जिल्हाधिकारी कार्यालयाकडे पाठवला होता. त्यानुसार जिल्हाधिकारी तथा जिल्हादंडाधिकारी विनय गौडा जी. सी. यांनी 9 जून 2026 रोजी महाराष्ट्र प्रिव्हेन्शन ऑफ डेंजरस ॲक्टिव्हिटीज (MPDA) कायद्याच्या कलम 3(1) अंतर्गत स्थानबद्धतेचा आदेश जारी केला.
या आदेशाची अंमलबजावणी करत 10 जून 2026 रोजी आरोपी गणेश पवार याला ताब्यात घेऊन अकोला जिल्हा कारागृह येथे स्थानबद्ध करण्यात आले.
ही कारवाई अपर पोलीस अधीक्षक प्रशांत स्वामी, उपविभागीय पोलीस अधिकारी सुनील पाटील यांच्या मार्गदर्शनाखाली स्थानिक गुन्हे शाखा व एमआयडीसी पैठण पोलिसांच्या संयुक्त पथकाने यशस्वीरीत्या पार पाडली.