पैठण तालुक्यातील दोन मोठ्या बातम्या अवघ्या २४ तासांत खुनाच्या गुन्ह्याचा छडा; एमआयडीसी पैठण पोलिसांची जलद कारवाई पैठण | (प्रतिनिधी इकबाल शेख) 
एमआयडीसी पैठण पोलीस ठाण्याच्या हद्दीतील जायकवाडी उत्तर परिसरात घडलेल्या खुनाच्या प्रकरणाचा अवघ्या २४ तासांत छडा लावत पोलिसांनी एका आरोपीला अटक केली असून एका विधीसंघर्षग्रस्त बालकाला ताब्यात घेऊन बाल न्याय मंडळासमोर हजर करण्यात आले आहे.पोलिसांनी दिलेल्या माहितीनुसार, दिनांक २२ जून २०२६ रोजी जायकवाडी उत्तर येथील जुन्या बसस्थानकाजवळ, पाठबंधारे विभाग कार्यालयाच्या परिसरात प्रभुराम भास्कर सुरडकर यांचा मृतदेह काटेरी झुडपांमध्ये आढळून आला होता. पुरावा नष्ट करण्याच्या उद्देशाने मृतदेह झाडाझुडपांत टाकून देण्यात आल्याचे प्राथमिक तपासात समोर आले.याप्रकरणी मयताचे भाऊ आकाश भास्कर सुरडकर (रा. संजयनगर कातपूर, ता. पैठण) यांच्या फिर्यादीवरून एमआयडीसी पैठण पोलीस ठाण्यात गुन्हा क्रमांक १९७/२०२६ अंतर्गत भारतीय न्याय संहिता कलम १०३(१) व २३८ अन्वये अज्ञात व्यक्तीविरुद्ध गुन्हा दाखल करण्यात आला होता.गुन्हा दाखल होताच सहाय्यक पोलीस निरीक्षक भरत मोरे यांच्या नेतृत्वाखाली दोन विशेष पथके तयार करून तपास सुरू करण्यात आला.तपासादरम्यान हा गुन्हा मयताचा मित्र असलेल्या एका विधीसंघर्षग्रस्त बालकाने केल्याची माहिती पोलिसांना मिळाली.चौकशीदरम्यान संबंधित बालकाने गुन्ह्याची कबुली दिली. दारू पिण्यानंतर झालेल्या वादातून त्याने प्रभुराम सुरडकर यांना धक्काबुक्की करून खाली पाडले. त्यानंतर त्याने आपला मित्र विशाल उर्फ शेरा बबन खंदारे (वय २३) याला घटनास्थळी बोलावले.दोघांनी मिळून मारहाण केल्यानंतर मोठा दगड टाकून प्रभुराम यांचा खून केल्याची कबुली दिली.गुन्हा लपविण्यासाठी मृतदेह काटेरी झुडपांमध्ये टाकून दिल्याचेही तपासात उघड झाले.या प्रकरणी विशाल उर्फ शेरा बबन खंदारे याला अटक करण्यात आली असून विधीसंघर्षग्रस्त बालकाला बाल न्याय मंडळ, छत्रपती संभाजीनगर येथे हजर करण्यात आले आहे.
तपासादरम्यान अनुसूचित जाती-जमाती (अत्याचार प्रतिबंधक) अधिनियम, १९८९ अंतर्गत कलम ३(२)(v) ची भर घालण्यात आली असून पुढील तपास उपविभागीय पोलीस अधिकारी सुनील पाटील हे करत आहेत.ही कारवाई पोलीस अधीक्षक प्रकाश जाधव, अपर पोलीस अधीक्षक प्रशांत स्वामी, उपविभागीय पोलीस अधिकारी सुनील पाटील तसेच स्थानिक गुन्हे शाखेचे पोलीस निरीक्षक विजयसिंग राजपूत यांच्या मार्गदर्शनाखाली करण्यात आली. या मोहिमेत सहाय्यक पोलीस निरीक्षक भरत मोरे यांच्यासह पोलीस अधिकारी व कर्मचाऱ्यांच्या पथकाने महत्त्वाची भूमिका बजावली./संत एकनाथ सहकारी साखर कारखान्यासमोर जुगार अड्ड्यावर छापा; 54 हजारांचा मुद्देमाल जप्त
पैठण | प्रतिनिधी
एमआयडीसी पैठण पोलीस ठाण्याच्या पथकाने संत एकनाथ सहकारी साखर कारखान्यासमोरील परिसरात कारवाई करत हार-जीत प्रकारचा जुगार खेळविणाऱ्या एका आरोपीविरुद्ध महाराष्ट्र जुगार प्रतिबंधक कायद्यान्वये गुन्हा दाखल केला आहे. या कारवाईत सुमारे 54 हजार रुपयांचा मुद्देमाल जप्त करण्यात आला.पोलिसांनी दिलेल्या माहितीनुसार, दिनांक 20 जून 2026 रोजी रात्री 8.40 वाजण्याच्या सुमारास संत एकनाथ सहकारी साखर कारखान्यासमोरील एका पत्र्याच्या शेडमध्ये सार्वजनिक ठिकाणी पैसे घेऊन चक्री चार्टवर हार-जीत नावाचा जुगार खेळविला जात असल्याची माहिती मिळाली होती.या माहितीच्या आधारे एमआयडीसी पैठण पोलिसांनी छापा टाकला असता कृष्णा साहेबराव तांबे (वय 32, रा. पेपरगील, ईसारवाडी, ता. पैठण, जि. छत्रपती संभाजीनगर) हा लोकांकडून पैसे घेऊन जुगार खेळविताना आढळून आला.
कारवाईदरम्यान पोलिसांनी एक एलसीडी स्क्रीन, संगणक सीपीयू, फ्रॉनटेक कंपनीचा कीबोर्ड व माऊस, जुगारासाठी वापरला जाणारा चक्री चार्ट तसेच 2 हजार 900 रुपये रोख रक्कम असा एकूण 54 हजार रुपयांचा मुद्देमाल जप्त केला.
याप्रकरणी पोलीस उपनिरीक्षक दशरथ विश्वनाथ बुरकुल यांच्या फिर्यादीवरून एमआयडीसी पैठण पोलीस ठाण्यात गुन्हा क्रमांक 195/2026 अंतर्गत महाराष्ट्र जुगार कायदा कलम 12(अ) नुसार गुन्हा दाखल करण्यात आला आहे.आरोपीस नोटीस बजावून कायदेशीर प्रक्रियेनुसार सोडण्यात आले असून पुढील तपास पोलीस हेडकॉन्स्टेबल करतारसिंग सिंगल हे करीत आहेत.